天仙局

近年男裝潮流奄奄悶悶，官仔骨骨打扮以畀跟得貼的MK仔玩到臭。話時話，旺角商場仔賣的窄身西裝，窄是夠窄身，但總是無來貴格，求高人指點一下當中分別。

扮大人潮流無突破，大家都想另谷潮流取而代之。MILK近年力谷那些outdoor同民族打扮，但看來吃力非常。你知香港人是什麻料子，一身民族打扮根本同乞兒無分別。著起龍袍已經唔似太子，現在重要被被搭搭，都唔化。

不過谷邊樣唔谷邊樣都是錢決定，MILK力谷大多是自己有售的品牌。既然傻仔天生畀人呃，咁我呃佢好過畀其他人呃咯。

笨實

I.T集團用二千幾萬買咗A Bathing Ape，好多人話笨實。有謂殺頭生意有人做，蝕本生意無人做，只係二千幾萬，認真濕濕碎。要知，依種搵笨「名牌」由最高處下流到最低層都要一段時間，而下面重有一個第三世界國家未開發，只要I.T集團谷谷佢搵明星吹下，難保第日發到襪都著唔落。
最近又見Palladium係香港出現。記起廿幾年前Palladium係香港興過一輪，果陣我都好威威買過一對白色低筒。只要興，懶理著得唔舒服，有苦自己知。幾年後正如所有潮流一樣，已無人記得。
以前見到老一輩潮人，總有一份on9的感覺，點解佢哋打扮總係時間停頓？今日明白，所謂潮流總係興完又謝謝完又興。好似Palladium廿年前興過，點知廿年後又話回歸。老一代潮人經歷過當年的洗禮，自然對潮流唔潮流抱睬你都有味的心態。

回魂

返唻咯......

+J一到貨，當然走去望望，窮都要漂亮。當日買開正版JIL SANDER，今日同人迫+J，眼淚在心裡流。+J男裝水準穩定，基本所有款式都是長青設計。選的，就是剪裁同布料。人人都話JIL SANDER的剪裁水準超曬班。+J連超細碼人都fit到，不過是因應日本市場還是JIL SANDER的原因就考開亞SIR。布料不過不失，以如此價錢都算交足貨。一直都對UNIQLO的質料有信心，相比起H&M的crossover貨，如菜渣的布料，一件都未買過。

+J系列返貨翌日已無細碼，都唔知有無搞能錯。

炳炳

十多二十年前聽回來，我猜珍珠都無咁真。

當時有位非常出名的indie樂評人，自己入了大量某唱片，跟住係自己樂評大讚特讚，又話唔聽就笨實云云。

你重跟那些潮流達人買衫褲？！懵炳！

未

我當然未死。只係沉睡。

邪邪邪

香港有太多邪惡事。

一直唔明著polo裇點解要反條領。除非閣下身形如D&G的模特兒，又橫又高肉底夠厚，否則反領polo裇著法還是少試為妙。品味出事，大多欠了自省。相學好似話要入型入格先係正貨。一個矮冬瓜何苦要將條領反起？古巨基是欠自省樣辦。明明只襯乖乖仔擔屎唔偷食造型，偏偏要五顏六色亂放上身。睇見佢都辛苦。

另一polo裇的邪事係大多男人都衣不稱身。究竟大家有無試穿一下才買？還是男人大多愛oversize風格？polo裇已是非常易穿好看的服飾，做到乾淨企理非難事。OK，五十打後穿衣舒適自在是應該，就如沒可能要我爺爺一身trim fit打扮。但廿幾三十歲人，何不用心留意一下呢？

潮流演員

上網看了大部份2010春夏男裝，感覺口淡淡，無些神氣。除了ALEXANDER MCQUEEN及JOHN GALLIANO，大多悶出鳥來。可能經濟差，人人怕死，都係整返些穩穩陣陣的靚衫出來算數。以前會覺得JOHN GALLIANO的衫痴痴地，今日拼在其他悶蛋設計中，忽然又有咁至係衫之感。

經濟下滑，除了令衫褲發出悶臭味外，對潮流雜誌一樣係大打擊。廿年前人人走去天星碼頭買《i-D》扮潮人，重記得當時賣到二百幾銀一本。廿年後的《i-D》由一年出十二期變為六期，這可視為一個時代的完結，又或係一個新時代的誕生。

經濟下滑加互聯網爆發，令潮流雜誌（或傳統傳媒）不知如何自處。以上現象絕對可以畀潮流演員黎堅惠係《明周》吹足三期水。

Veronique Branquinho to close

難過。

一直覺得VERONIQUE BRANQUINHO的男裝非常不錯，易穿高質剪裁靚。最重要是價錢不在天價。只奈何名氣不響，在如此經濟艱難時期唯有拜拜。

搞男裝（尤其在香港）最難係找到平衡點。實用的款式，大家都不理會你用料如何高貴，剪裁何如合身。賣上幾千銀，我們只會說同ZARA有乜分別？好了，去搞款，大家又話頂唔順。要知香港人只是比大清時代的人開放少少。好似套粉紅GIVENCHY西裝，我哋咪一樣話難頂。

我買得起，又會買的品牌又少一隻。

忽然想起黃偉文的話，喜歡的品牌真的要支持一下，否則第日想買都無得買。

搵笨

日前讀過一篇報導，內容乏善可陳，只係其中較有趣部份是將貴衫平衫放在一起，看那些時裝界高層能否分辨出來。

從其過程發現，所有時裝界高層都從布料著眼，即分辨貴衫平衫不是從款式入手，而是看布料是否優質。

即使一件貴衫個款識飛，若布料不好，都是搵笨貨。

我話嘅。

報導。

認同

很早前友人就話，今日的SIMONS已不是當年的SIMONS。我不認同，因為看著他每季設計的轉變，你會發現那是一種理所當然的變化。莫非季季一樣才叫堅守風格？

但近日，我已轉呔。我開始覺得今日的SIMONS已不是當年的SIMONS。不在於SIMONS先生的設計，而是因為他近年不停和其他品牌推出什麼crossover產品。老實，雖然那些雜交產品還是比別人的強，但有留意他自家的服飾，就會明白那都是搵錢至上的貨。好似同DR. MARTENS的雜交鞋，好on9。

友人話日本人資金灌了入去，今日終於見到個果，就係搵錢才是硬道理。